Raportet mes Vinicius Junior dhe Xabi Alonso kanë hyrë në një fazë të tensionuar në javët e fundit, pas asaj që ndodhi në El Clásico kundër FC Barcelona. Te Real Madrid konsiderojnë se situata me brazilianin po ndikon edhe brenda dhomës së zhveshjes, dhe për këtë arsye drejtuesit e klubit kanë vendosur të ndërhyjnë direkt. Ata kanë kërkuar nga Roberto Carlos që të veprojë si ndërmjetës dhe të qetësojë marrëdhënien mes trajnerit dhe sulmuesit brazilian.

Në ditët e fundit, legjenda braziliane ka pasur disa biseda me Vinicius për të ulur tensionet me Xabi Alonso. Qëllimi nuk është që ata të bëhen shokë të ngushtë, pasi kjo aktualisht duket e vështirë, por që sulmuesi të mund të përqendrohet në detyrën e tij dhe të japë më të mirën në stërvitje dhe ndeshje.

Edhe pse lidhja me trajnerin është minimale, te Reali besojnë se situata mund të përmirësohet. Hapi i parë është që Vinicius të fokusohet në performancën e tij dhe të japë maksimumin në fushë. Për këtë arsye, drejtuesit kanë kontaktuar me Roberto Carlos, duke e konsideruar atë një figurë të respektuar dhe një këshilltar të besueshëm për brazilianin.

Roberto Carlos, ish-mbrojtësi legjendar i Real Madrid, ka këshilluar Vinicius si një vëlla më i madh ose si një mik i mirë, duke i dhënë këshilla me perspektivë madridiste, por edhe realiste. Qëllimi është t’i bëjë të kuptojë se konflikti nuk çon askund dhe se më e mira për të gjithë është të punojnë së bashku për suksesin e ekipit.

Rëndësia e marrëdhënies Xabi – Vinicius për rinovimin e kontratës

Marrëdhënia mes Vinicius dhe Xabi Alonso mund të jetë vendimtare për rinovimin e kontratës së brazilianit me Real Madrid. Nëse Vinicius vendos të mos rinovojë, Florentino Pérez nuk dëshiron të rrezikojë që ai të largohet pa asnjë fitim dhe mund ta vendosë në shitje. Aktualisht duket se sulmuesi nuk është i gatshëm të rinovojë për shkak të marrëdhënies me trajnerin.

Në këtë kontekst, ndërhyrja e Roberto Carlos mund të jetë kyçe për të bindur Vinicius të përmirësojë marrëdhënien me trajnerin dhe të mendojë për të ardhmen te klubi. Drejtuesit e Real Madrid besojnë tek influenca dhe përvoja e legjendës për të qetësuar situatën.

Karakteri i Vinicius është i zjarrtë dhe shpesh herë i vështirë për t’u menaxhuar, por te Real Madrid e dinë se në thelb ai është një lojtar me zemër të madhe. Arritja e një marrëveshjeje me të është thelbësore, pasi klubi nuk dëshiron të humbasë një nga lojtarët e tij më të mirë.